Այս օրերին, երբ կրկին փոթորկված է Հայաստանը, հրապարակվել է Վազգեն Սարգսյանի «Էս ի՞նչ եք անում, տղերք» պատմվածքների և հրապարակախոսության սքանչելի ժողովածուն:

Ժողովածուի մասին ներքևում, իսկ  սկզբից Վազգեն Սարգսյանի «Պատմության սկիզբն ու շարունակությունը» գիրը, որը այդ հրաշալի ժողովածուի խմբագրի թույլտվությամբ «ՀԱՅԵՐ»-ում հրապարակվում է առաջին անգամ...  

Այս տողերը Վազգեն Սարգսյանը գրել է 1999 թվականի հոկտեմբերին...

Հոկտեմբերի մեկի՞ն, տասի՞ն, քսանի՞ն... Հայտնի չէ: Կամ գուցե հայտնի է:

Ամեն դեպքում, այս տողերը գրել է սպանվելուց առավելագույնը 27 օր առաջ...

Ինչո՞ւ: Սպանության էպիկրի՞զն էր շարադրում նրանց համար, ովքեր հետագայում հերձելու էին պատմությունը, թե՞ չհերձվող պատմության հետագիծն էր անթեղում:

Պատահական է՞ արդյոք, որ 88-ին, երբ թողնում էր գիրը, որովհետև հայոց բանակն էր արարելու որպես ստեղծագործություն, վախենում էր «ցավի առուծախից», իսկ 99-ին, երբ հայոց բանակը հող էր վերադարձրել առաջին անգամ հարյուրամյակների մեջ, վախենում էր «մեռոնին թույն խառնողներից»: Ու բոլոր այս վախերով անցնում էր Մեղրին՝ մի բուռ անհող Մեղրին...Դժվար է ասել: Կամ գուցե դժվար չէ...

Մնացյալը թողնում ենք ձեզ...

«Պատմության սկիզբն ու շարունակությունը». ՎԱԶԳԵՆ ՍԱՐԳՍՅԱՆ 

«…Եվ նրանց ոտնահետքերով սկսվում է պատմությունը:

Այս նախադասությունը հազար անգամ հազար մարդու մասին հազար տարում կարող էր գրվել: Այս նախադասության տեր կարող էին լինել ոչ միայն անհատները: Այս նախադասությանը թիկունք էր պետք՝ ժողովուրդ էր պետք, որ պատմությանը տեր է ու այդ պատմության տակ այլևս չի ճկռելու, ճկվելու ու ճոճվելու: Այս նախադասությունը չի գրվել նաև այլ պատճառով՝ գրող չի եղել: Գիտակցություն չի եղել, որ պատմությունը պիտի իմաստավորվի, որ պատմության դիմաց ու պատմության համար կա պատասխանատվություն, որ պատմությունը քո, իմ, նրա կյանքի շարադրանքը չէ:

Գիտակցություն չի եղել, որ պատմությունն ունենում է ոտնահետքեր:

Ու մենք հեռացել ենք մեզնից, մեզ խլել են մեր բուն կերպ ու կերպարից, մեզ հագցրել են իրենց կերպարը, որ ապրենք իրենց հաճո ու հարմար կյանքով: Եղել է: Եվ եղել է, որ մեր ձեռքով բացել ենք մեր անառիկ ամրոցների դարպասները ու մեր սիրելի թշնամուն ասել ենք՝ արի, քոնն է, արի ու կեր մեզ, մեր բարիքը, վառիր մեր տունը, մենք քեզ արժանի ենք: Թե ինչ-որ խելառ էլ հանկարծ որոշել է դիմադրել, մեր ձեռքով հերն անիծել ենք:

Ու հիմա՝ Մեղրին:

Աշխարհագրական տարածք չէ Մեղրին, հայրենիքի մի բուռ հող չէ: Մեղրին քո տան դուռն է, հայ: Մեղրին քո հացի մայան է: Եվ երբ դու Մեղրին տալիս ես օտարին, քո տան դուռը փակում ես քո վրա: Չգիտեմ՝ ներսից, չգիտեմ՝ դրսից, ու բանալին կախում ես կրծքիցդ: Քանի բանալի կար կախված 1915 թվից: Քանիսը կորավ: Քանիսը մնաց: Իսկ դռները՝ բաց… Տանը հայ չկա: Թուրք-մուրք չգիտեմ, պատերազմ-մատերազմ չգիտեմ՝ համաշխարհային-մամաշխարհային՝ արդարացում հնարեցինք, թիկունքում պահվեցինք, որ չխոստովանենք՝ 1915 թ. առաջ ու հետո ու հիմա տեր չէինք, չեղանք, տեր չենք դառնում մեր տանը: Մենք վախենում ենք մեր ուժից: Մեզ վարժեցրել են ուրիշի ուժին: Մենք ընտիր-ընտիր հպատակ ենք, մենք խելոք-խելոք կատարող ենք, մենք հայտնագործություն ենք ուրիշի ձեռքի տակ:

Հայ մարդ, հիմա ուրիշը դու ես: Քո ուրիշը դու ես:

Ու ոչինչ, որ սկզբից, հին սովորույթի, վախի, անվստահության, չգիտեմ էլ ինչի պատճառով դու քո մեջ քեզ թշնամի ես որոնում, գտնում ու ուրախանում, որ մեղավոր կա: Ոչինչ, բայց թող դա արագ անցի: Դու դրան մի հավատա. դու ճանապարհ ունես, դու տուն ունես, դու որդի ունես: Մի հավատա, թե քո թշնամին քեզնից ուժեղ է: Թշնամուդ ուժեղացնողը քո վախն է, քո ցավն է, քո հիմարությունն է:

Ու հիմա՝ Մեղրին: Ասել, ասում եմ՝ Մեղրին ավելի կարևոր է, քան ցանկացած տարածք՝ նույնիսկ Ղարաբաղը:

Մեղրին իր քար ու քռայով այս երկիրը դարձնում է աշխարհի հզորներին իր դուռը բերող: Եվ այսօր տալ Մեղրին, թեկուզ դիմացը ծովի ճանապարհ ստանալ՝ սուտ է: Մեծ, համաշխարհային սուտ: Նախ՝ չեն տա, հազար ու մի ձև կա չտալու: Ղարաբաղը ապացույց, որ հողը գրիչով չեն վերցնում: Չեն տա: Եթե տան, ավելի վատ: Որովհետև իրենք շատ են, իրենք այսօր մեզնից ուժեղ են: Տվեցին, գալու են ու մեզ ուտեն: Իրենց թվով: Իրենց տնտեսությամբ: Իրենց փողով: Իրենց խելքով: Իրենց շահով:

Ես չեմ վախենում: Ես ոչ մեկից չեմ վախենում:

Ես զգուշացնում եմ՝ պատմությունը նաև ավարտվում է ոտնահետքերով:

Մեր ոտնահետքերով մեր պատմությունը չպիտի ավարտվի:

Եթե տաք Մեղրին, ձեր արյանը խառնում եք այն բենզինը, որը չի թունավորելու, պայթեցնելու ձեր գանգը: Ես զգուշացնում եմ՝ Մեղրին մի օր պայթելու է հենց Երևանի կենտրոնում:

Եվ նրանց ոտնահետքերով պատմությունը մեռնում է:

Դարերի մեռած պատմությունը թափ տվեք ձեր հոգուց, մի մեռեք ձեր տան մեջ: Ձեր հոգու մեռելներին թաղեք: Էս երկիրը ձերը չէ, դուք գալիս-անցնում եք, ձերը էս երկրի սիրտը պահելն է: Սիրտը: Ես ձեզ չեմ հասկանում: Ես ձեզնից վախենում եմ, դուք կգնաք ու ձեր զավակների վզից կկախեք Մեղրիի ձեր տան բանալիները, լաց կլինեք, կենաց կխմեք ու կսատկեք կարոտից, բայց զենք չեք վերցնի:

Ես ձեզնից վախենում եմ, դուք մեռոնին թույն կխառնեք…»:

1999 թ. հոկտեմբեր

Հ.Գ.

ԳՐՔԻ ՄԱՍԻՆ 

Հրապարակվել է մի գիրք, որում արտաքուստ ոչ մի նոր բան՝ Վազգենի գրականությունն է՝ որձաքարի նման պինդ ու չեչոտ, բառի հանդեպ դողով, երկյուղածությամբ, մարդու հանդեպ՝ սիրով, անմնացորդ սիրով, պաշտամունքով: Վազգենի գրականությունն է՝ «Հացի փորձություն»-ով, «Դրախտ ես դու, դրախտ, Փառանձեմ»-ով, «Էս խելքին ենք, որ այս խելքին ենք»-ով, «Էս ի՞նչ եք անում տղերք»-ով, «Շանթարգել»-ով, «Էխ Նհո, Նհո»-ով, «Հավերժական շարժիչ»-ով...

Նորը միայն այն անսահման սերն է ու նվիրումը առ Վազգենի գիրը, խոսքը, տողը, բառը, այն պատասխանատվությունն է առ նրա գրական ժառանգությունը, որի շնորհիվ այն հատիկ-հատիկ, խնամքով, ջանասիրաբար վերջին հրատարակությունից 18 տարի անց եզակի մի ընդգրկվածությամբ հավաքվել է մի սքանչելի գրքում, որն առանց վարանելու կարող ենք գրական իրադարձություն համարել, գրական ճնշում ժամանակի վրա, արժեքային ու մշակութային ժամանակներին վերադառնալու ազնիվ ջանք:

Եվ այս ամենը գրքի խմբագրի՝ երիտասարդ գրող Արմեն Սարգսյանի նվիրյալությամբ, որ կարողացել է երկար ժամանակի մանրակրկիտ աշխատանքով հմտորեն մտնել Վազգեն Սարգսյանի աշխարհը, Վազգենի ընտանիքի հետ գործակցությամբ պեղել նաև սակավ հայտնի տողեր, «Վերնատուն» հրատարակչություն-«ՈՍԿԱՆ ԵՐԵՎԱՆՑԻ» տպագրատուն-ստեղծագործական թիմ՝ շապիկի ձևավորող, էջադրող, սրբագրող բազմանկյուն տառապանքում ստեղծել իր ընդգրկունությամբ և տպագրական կարգով Վազգեն Սարգսյան անհատին պատշաճող մնայուն մի արժեք, որի անունն է նոր ժամանակների գիրք և որն արդեն գրախանութներում է ու սպասում է ընթերցողին: